Настани

Бугарскиот писател и театарски режисер Петар Денчев во Скопје

petar dencev

Петар Денчев е бугарски писател и театарски режисер, тој во рамките на книжевната резиденција „Апсолутно модерен“, во организација на издавачката куќа Готен, а под покровителство на Европската мрежа за книжевност и книги Традуки, во текот на месец јуни престојува во Скопје. Роден е 1986г. во Варна. Во 2010 година дипломирал режија на драмската академија “Крсто Сарафов”, каде што работел по текстови на Гогољ, Молиер, Ведекинд. Литературно деби му е расказот “Малакоф, сакам да остарам”, кој е награден на конкурсот “Екстаза” на списанието “Алтер” (2006). Следат неколку награди и номинации од различни поетски конкурси.

Два пати ја добива втората награда на Националниот младински поетски конкурс “Веселин Ханчев” (Стара Загора, 2006 и 2010). Со романот “Како што  мажот ја бакнува љубената” победи на конкурсот за нов бугарски роман “Развој” (2007), а потоа и наградата на Рајфајзен банката на конкурсот “Јужна пролет” (2008).

Неговите наставни театарски претстави гостуваат на различни фестивали во Србија, Бугарија и Косово и од тогаш датира неговиот интерес кон земјите од поранешна Југославија. Дебитира како режисер со претставата “Жената од минатото” по Роланд Шимелфениг, која подоцна е одиграна на фестивалот “Славија” во Белград. Ги поставува “Карневал” од Жорди Галсеран, “Медеја” на Еврипид, Ануј и Драер, “Морски пејзаж” од Едвард Олби, “Ромео и Јулија” и “Дванаесеттата ноќ” од Шекспир, како и “Мизантроп” од Молиер.

Автор е на збирката раскази “Приказни во минато време” (2011, ИК “Џенет 45”), а последната книга е експерименталниот роман “Тивкото сонце” (2012, ИК “Џенет 45”). Има објавувано во сите големи бугарски весници и списанија како и во американското The Litter box magazine и на хрватскиот сајт “Критична маса”.

Два пати гостувал на фестивалот за краток расказ “Кикинда Шорт” во Кикинда, Србија, а во 2013 година е гостин на писателската резиденција во Тршиќ, Србија. Денчев има значаен интерес кон соседните литературни сцени, вклучувајќи ја и македонската.

Со Македонија го поврзува познаството со младите македонски писатели. Во моментот подготвува посебен број посветен на бугарски автори, на српски, во списанието Elektrobeton, во ко-уредништво со македонскиот книжевен критичар и преведувач, Далибор Плечиќ.

Негов интерес е начинот на кој политичката историја и тековните околности се одразуваат врз уметноста. Затоа неговиот престој во Македонија го користи да ја проследи современата културна и политичка сцена. Во моментов работи напорно на новиот роман кој се занимава со криминалната психологија, утопијата, слободата и опасностите на утилитарноста и на рационализмот.

 



Остави Коментар